انا فصلت شحن خلاص و هنجت

- مصطلحات ايه يا عم ؟؟
* مش عارف انا النهاردة سمعت حاجات غريبة كده .. اشي هنجت على جبت جاز على فصلت شحن .. ده كده الواحد هيشك في جنسيتو انو عربي ..
- لا يا سيدى .. ده بقى العادي عندنا .. امال لما كنت في الجامعة كنتو بتتكلمو ازيا مع بعض؟؟
* سؤال غبي .. كنا بنكلم عربي يا احمد
وطولت القعدة ولقيت قريبى مش مقتنع أبدا بعلم المصطلحات اللي نازل جديد في السوق اليومين دول .. هوا فعلا أقنعني ان اللغة دي ليها تأثير على اللغة العربية وممكن تضعف اللغة العربية عندنا .. ومش عارف ليه لما سالني : اشمعنى اللغة دي منتشرة في مصر بس ؟؟ ... معرفتش ارد عليه .. تفتكرو ايه السبب في ان اللغة دي انتشرت بين المصريين بس .. بصراحة انا عن نفسي بستخدم اللغة دي .. بس فعلا حاجة غريبة .. لأنها فعلا عاملة زي العلم اللي كل يوم يطلع جديد .. لسة اول امبارح كنت متخانق مع واحد وكان معايا احد اصدقائى : يا احمد .. كاف جيم ..
قلت له : نعم يا اخويا .. دي جبنة أريش ولا دوا كحة ؟؟
قال لى : لا يا جاهل .. كاف جيم يعني ( كبر الجمجمة )
أنا بصراحة استغربت .. للدرجة دي مش عاوزين نتكلم وبنختصر .. ده احنا شعب ابتلينا بالكلام .. كل من هب ودب بيتكلم في اي حاجة وفي كل حاجة .. انما حكاية كاف جيم دي لسة جديدة ..قريبى طلب مني اسألكو سؤال : تفتكروا ايه عواقب المصطلحات دي على اللغة العربية ذات نفسها ؟؟ وده يطلع مين بسلامتو اللي اخترع المصطلحات دي وراح الشباب كلو جاري ورا زي ما يكونو بيشترو كيلو لحمة .. لأن الموضوع انتشر بصورة فظيعة وبسرعة جدا .. وحكاية كاف جيم ( ك - ج ) \لف باء( ب - أ ) دي على فكرة حاجة من ضمن الحاجات اللي بيخلينا نستهيف شباب اليومين دول . .. وعلى فكرة ( ب - أ ) يعني بطلا استهبال .. من باب إثراء المعلومات .. ..